Plantun de Prouvènço

Pèr coumpara dos planto d'encò nostre

Pilosella corymbuloides & Myosotis laxa

Pilosella corymbuloides

Asteraceae Compositae

Nom en français : Piloselle à inflorescence corymbiforme.

Descripcioun :
Aquesto peludello coumuno, mai pas trop bèn couneigudo, trachis dins li pelouso aupenco pulèu sus sòu séusous. Fai partido dóu group de peludello que soun pas bourrihudo sus lou dessouto di fueio ; podon pamens agué quàuqui péu estela. Pòu faire quàuqui fiéu (estouloun) courtet e ansin douna uno pichoto coulounìo. Li flour coumpausado an si brout en pinceloun (courimbo) un pau sarra.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 25 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Pilosella
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 1,5 à 2 cm
Flourido : Printèms - Estiéu

Sòu : Si (Ca)
Autour basso e auto : 1600 à 2600 m
Aparado : Noun
Jun à avoust

Liò : Pelouso - Roucaio - Champino
Estànci : Subaupen à Aupen
Couroulougi : Ouroufito-Aupenco
Ref. sc. : Pilosella corymbuloides (Arv.-Touv.) S.Bräut. & Greuter, 2008 (= Pilosella smithii Arv.-Touv. = Hieracium corymbuloides Arv.-Touv., 1872 )

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").